Twee Bloemfonteinse broers wat ‘n buitengewone talent vir musiek het, sing nou gehore behoorlik aan die brand in Griekeland. Get It het met Leendert en Lomon de Jager gesels oor hulle suksesvolle musikale driemanskap saam met Overtone se Eduard Leonard.
Staande Griekse gehore, uitverkoopte konserte, blink ligte en derduisende aanhangers. Dít is die nuwe lewe van Leendert en Lomon de Jager – musiek-en drama-liefhebbers van Bloemfontein. Twee jaar gelede sou hierdie scenario soos ‘n vergesogte droom gelyk het vir die De Jager-broers, maar vandag kan hulle nie voorbly met versoeke uit verre lande om hulle te gaan bederf met hul musiek nie. Prima Voce: The South African Tenors, is laat in 2013 gestig en bestaan uit die broers, Leendert en Lomon de Jager, en Eduard Leonard– mede-stigter van die bekende acapella-groep Overtone. Overtone is bekend vir die vervaardiging en sing van die temalied vir die Suid-Afrikaanse film, Invictus.
Prima Voce se musiek word grotendeels saamgestel uit werke van komponiste van verskillende genres. Die drie skryf ook hul eie musiek en doen baie van hul eie musiekverwerkings. “Ons sing in verskeie tale – Engels, Italiaans, Spaans, Duits en selfs Afrikaans,” sê Lomon.
Leendert vier vanjaar sy 20ste jaar in die vermaaklikheidsbedryf. Hy het wye ondervinding as sanger, akteur, skrywer en regisseur, waarvan die meeste plaasgevind het terwyl hy in Bloemfontein gewoon het. Van die produksies wat deur hom geregisseur is, sluit in Peter Schaffer se Amadeus, Jen Genet se The Maids en Disney se High School Musical. Hy is tans die musiekverwerker vir Prima Voce.
Comments